ಮೊಗಾಳ್ ಬೈಂದೂರ‍್ಚಿಝಳಕ್ ಸರ್ವ್ ವೀಕ್ಷಕಾಂಕ್ ತಶೆಂಚ್ ಸರ್ವ್ ಬೈಂದೂರ್ ಫಿರ್ಗಜ್ಗಾರಾಂಕ್ ಕಾಳ್ಜಾ ಗುಂಡಾಯೆಚೊ ಪ್ರಣಾಮ್. - ಅಶೋಕ್ ಬೈಂದೂರ್
ಬೈಂದೂರ‍್ಚಿಝಳಕ್ ಫಿರ್ಗಜ್ ಅಂತರ್ಜಾಳ್ ಉಜ್ವಾಡಾಕ್ ಯೇವ್ನ್ ನವೆಂಬ್ರಚಾ 25 ತಾರೀಕೆರ್ ಧಾವ್ಯಾ ವರ್ಸಾಚೊ ಸಂಭ್ರಮ್ ಮ್ಹಣ್ ಥೊಡ್ಯಾ ದಿಸಾಂ ಆದಿಂ ಕಳಿತ್ ಜಾತಾನಾ ಬೈಂದೂರ‍್ಚಿಝಳಕ್ ಅಂತರ್ಜಾಳಿಕ್ ದೋನ್ ಉತ್ರಾಂ ಬರಂವ್ಕ್ ಖುಶಿ ವ್ಹೆಲಿಂ.
ಧಾ ವರ್ಸಾಂ ಆದಿಂ ಡೊಲ್ಫಿ ನಜ್ರೆತ್, ಕ್ಲಿಂಟನ್ ಡಿಸೋಜಾ ಆನಿ ದೆ| ನೆವಿಲ್ ಫೆರ್ನಾಂಡಿಸಾಚಾ ಹಾಂಚಾ ಚಿಂತ್ನಾನಿ ಬೈಂದೂರ‍್ಚಿಝಳಕ್ ಅಂತರ್ಜಾಳ್ ಉಗ್ತಾಡಾಕ್ ಯೇವ್ನ್ ಯಶಸ್ವಿ ಧಾ ವರ್ಸಾ ಸಂಪಯ್ತಾನಾ ಡೊಲ್ಫಿ, ಕ್ಲಿಂಟನಾಕ್ ಆನಿ ಲೊರೆನ್ಸಾಕ್ ಪರ್ಬಿ ಪಾಟಯ್ತಾ ಆನಿ ದೆ| ನೆವಿಲಾಚೊ ಉಗ್ಡಾಸ್ ಕಾಡುನ್ ಸಾಸ್ಣಾಚೊ ವಿಶೆವ್ ಮಾಗ್ತಾಂ.
ಏಕ್ ಬರ‍್ಯಾ ಉದ್ದೇಶಾನ್ ಉಜ್ವಾಡಾಕ್ ಆಯಿಲ್ಲೆಂ ಬೈಂದೂರ‍್ಚಿಝಳಕ್ ಸುರ್ವಾತ್ ಜಾತಾನಾ ಹಾಂವ್ ದುಬಾಯಾಂತ್ ಡೊಲ್ಫಿಚಾ ಲಾಗ್ಶಿಲ್ಯಾ ಸಂಪರ್ಕಾರ್ ಆಸ್‍ಲ್ಲ್ಯಾನ್ ಸುರ್ವಾತೆರ್ ಅಂತರ್ಜಾಳಿಕ್ ಜಾಯ್ ಆಸ್ಚಿಂ ವಿಷಯಾಂ ಭರೊಂಕ್ ತಾಣೆಂ ಕಾಡ್‍ಲ್ಲಿಂ ವಾಂವ್ಟ್ ಬರ‍್ಯಾನ್ ಜಾಣಾಂ. ಪ್ರತ್ಯೇಕ್ ಜಾವ್ನ್ ಫಿರ್ಗಜೆಂತ್ ಜಾಂವ್ಚಿ ಘಡಿತಾಂ ಪರ್ಗಾವಾಂತ್ ಆಸ್‍ಲ್ಲ್ಯಾಂಕ್ ಕಳಿತ್ ಜಾಯ್ಜಯ್ ಮ್ಹಳ್ಳೊ ಉದ್ದೇಶ್ ಡೊಲ್ಫಿ ಆನಿ ಪಂಗ್ಡಾನ್ ಸುರು ಕೆಲ್ಲೆಂ ಹೆಂ ಫಿರ್ಗಜ್ ಅಂತರ್ಜಾಳ್ ಮಾಂಯ್ ಗಾಂವ್ಚೊ ಹರ‍್ಯೇಕ್ ಖಬರ್ ಎಕಾ ಪಾಕ್ಯಾ ಪಂದಾ ಘಾಲುನ್ ಅಂತರ್ಜಾಳ್ ಚಲುನ್ ವ್ಹರ್ಚೆಂ ತಿತ್ಲ್ಯಾ ಸುಲಭಾಯೆಚೆ ನ್ಹಂಯ್, ಹೆರ್ ಖಬರ್ ವೇಳ್ ಕಾಡ್ನ್ ಪರ್ಗಟ್ ಕರ್ಯೆತ್ ಪುಣ್ ದೆವಾಧಿನ್ ಜಾಲ್ಲ್ಯಾ ವ್ಯಕ್ತಿಚೆ ವಿವರ್ ತ್ಯಾಚ್ ದಿಸಾ ಆನಿ ಮರ್ಣಾಂ ವಿಧಿ ವಿವರ್ ತಕ್ಷಣ್ಂಚ್ ಪರ್ಗಟ್ ಕರಿಜಾಯ್ ಜಾಲ್ಲ್ಯಾನ್ ಬೈಂದೂರ‍್ಚಿಝಳಕ್ ಅಂತರ್ಜಾಳಿರ್ ಚಡಾವತ್ ಜಾವ್ನ್ ಮರಣ್ ಪಾವ್‍ಲ್ಲ್ಯಾ ವ್ಯಕ್ತಿಂಚೆ ಆನಿ ಮರ್ಣಾಂ ವಿಧಿಂ ವಿವರ್ ಪಯ್ಲೆಂಚ್ ಮೆಳ್ತಾತ್. ಡೊಲ್ಫಿಕ್ ಸಾಂಗಾತ್ ಜಾವ್ನ್ ಝಳಕ್ ಆಂತರ್ಜಾಳಿಕ್ ತಸ್ವೀರ್ ಆನಿ ಹೆರ್ ಸಂಗ್ತಿ ಮೌನ್‍ಪಣಿಂ ಖಳಾನಾಸ್ತಾನಾ ವಾವ್ರ್ ಭೆಟಂವ್ಚೊ ಎ.ಒನ್. ಸ್ಟುಡೀಯೊಚೊ ಲೊರೆನ್ಸ್ ಫೆರ್ನಾಂಡಿಸಾಕ್ ಅಭಿನಂದನ್ ಪಾಟಯ್ತಾ. ಹ್ಯಾ ಧಾ ವರ್ಸಾಚಾ ಸಂದರ್ಭಾರ್ ಅಂತರ್ಜಾಳಿಚೆ ಆಕರ್ಷಿಕ್ ಡಿಸೈನ್ ಕೆಲ್ಲ್ಯಾ ಜಾಕ್ಸನ್ ಡಿ’ಸಿಲ್ವಾಕ್ ಅಭಿನಂದನ್.
ತರ್ ತುಮಿ ಮೊಗಾಚ್ಯಾಂನೊ ಚಿಂತಾ ಹ್ಯಾ ಅಂತರ್ಜಾಳಿ ಪಾಟ್ಲ್ಯಾನ್ ಕಿತ್ಲೆಂ ಮಿನ್ಹತ್ ಆಸಾ ಮ್ಹಳ್ಳೆಂ! ಎದೊಳ್ ಪರ್ಯಾಂತ್ ಹ್ಯಾ ವಾವ್ರಾಂತ್ ನಿಸ್ವಾರ್ಥಿ ಸೆವಾಚ್ಯಾ ಮನೋಭಾವಾನ್ ಆಪ್ಲಿಂ ಧಾ ಮೆಟಾಂ ಯಶಸ್ವೆನ್ ಸಂಪಯ್ಲ್ಯಾಂ ಆನಿ ಇಕ್ರಾವ್ಯಾ ಮೇಟಾಕ್ ಪಾಂಯ್ ತೆಂಕ್ತಾನಾ ಆಮಿ ಸರ್ವ್ ಚಡ್ ಆನಿ ಚಡ್ ಆಮ್ಚ್ಯಾಚ್ ಮಾಂಯ್ ಗಾಂವ್ಚ್ಯಾ ಫಿರ್ಗಜೆಚಾ ಬೈಂದೂರ‍್ಚಿಝಳಕ್ ಅಂತರ್ಜಾಳಿಕ್ ಸಾಂಗಾತ್ ದೀವ್ನ್ ತಾಂಚಾ ಯಶಸ್ವೆಕ್ ಆಮಿ ಭಾಗಿದಾರ್ ಜಾಂವ್ಕ್ ಸಾಂಗಾತ್ ದಿಂವ್ಯಾ.
ಕುಟ್ಮಾಂ ಖಾತಿರ್ ಪರ್ಗಾವಾಂತ್ ವಾವ್ರ್ ಕರುನ್ ಎಕ್ಸುರ್ಪಣಾಂತ್ ಜಿಯೆಂವ್ಚೆ ಮಾನಸಿಕ್ ಥರಾನ್ ಎಕಾ ರಿತೀಚೆ ಕಷ್ಟಾಂಚೆ, ತ್ಯಾ ಮಧೆಂ ವೇಳಾಚೊ ಸಾಕ್ರಿಫಿಸ್ ಕರ್ನ್ ಪಯ್ಶಿಲ್ಯಾ ಗಾಂವಾ ಥಾವ್ನ್ ಹ್ಯಾ ಅಂತರ್ಜಾಳಿ ಥಾವ್ನ್ ಖಬ್ರ್ಯೊ ಮೆಳ್ತಾತ್. ಹಾಂವೆ ಚಿಂತ್‍ಲ್ಲ್ಯಾ ಪ್ರಕಾರ್ ಚಡಾವತ್ ಜಾವ್ನ್ ಹ್ಯಾ ಧಾ ವರ್ಸಾಂತ್ ಡೊಲ್ಫಿಚೊ ವೇಳ್ ಆನಿ ಖರ್ಚ್ ದೊನಿ ಹ್ಯಾ ಅಂತರ್ಜಾಳಿ ಖಾತಿರ್ ಖರ್ಚಿಲ್ಯಾತ್ ತರ್ ಫಕತ್ ಬೈಂದೂರ್ಗಾರಾಂಚಾ ಮೊಗಾನ್ ಜಾವ್ನಾಸಾ. ಪಾಟ್ಲ್ಯಾ ಧಾ ವರ್ಸಾಂತ್ ಕಾಂಯ್ ಇಲ್ಲೆಂ ಪೋಷಕಾಂನಿ ಸಾಂಗಾತ್ ದಿಲಾಸ್ತಾ ಮುಕ್ಲ್ಯಾ ದಿಸಾಂನಿ ಆಮಿ ಮೊಗಾಚಾನೊಂ ಆಮ್ಚ್ಯಾ ಫಿರ್ಗಜೆಚಾ ಅಂತರ್ಜಾಳಿಕ್ Birthday, First Communion, Wedding Greetings, business advertising ಅಸಲ್ಯಾ ಮುಕಾಂತ್ರ್ ಆಮಿ ಆರ್ಥಿಕ್ ಸಹಕಾರ್ ದಿಲ್ಯಾರ್ ಅಂತರ್ಜಾಳಿಚಾ ಖರ್ಚಾಕ್ ಆನಿ ತ್ಯಾ ಮುಕಾಂತ್ರ್ ಕಾಂಯ್ ಫಿರ್ಗಜೆಚಾ ಗರ್ಜಾಂಕ್ ಕುಮಕ್ ಜಾಂವ್ಕ್ ಸಾಧ್ಯ್ ಆಸಾ ತರ್ ಸರ್ವ್ ಫಿರ್ಗಜ್ಗಾರಾಂಕ್ ಆಧಾರ್ ಜಾಂವ್ಕ್ ಹಾಂವ್ ವಿನಂತಿ ಕರ್ತಾಂ.
ಯಶಸ್ವಿ ಜಯ್ತಾಂಚಿ ಧಾ ಮೆಟಾಂ ಸಂಪಯಿಲ್ಲ್ಯಾ ಬೈಂದೂರ‍್ಚಿಝಳಕ್ ಪಂಗ್ಡಾಕ್ ಪರತ್ ಅಭಿನಂದನ್ ಪಾಟಯ್ತಾ ಆನಿ ಮುಕ್ಲ್ಯಾ ದಿಸಾಂನಿ ಝಳಕಾಚಿ ಸರ್ವ್ ಯೋಜನಾಂ ಸುಫಳ್ ಜಾಂವ್ ಮ್ಹಣ್ ಅಶೆತಾಂ. ಲಾಂಬ್ ಜಿಯೊ ಬೈಂದೂರ‍್ಚಿಝಳಕ್.
