ಭಾವಾಡ್ತಿ ಶಿಕ್ಷಣಾಚೆ ವರಸ್ ಉಗ್ತಾವಣ್

By ByndoorchiZalak, Pics: Lawrence Fernandes, 07 June, 2026

ಬೈಂದೂರ್: ‘ಭಾವಾರ್ಥಿ ಜಿವಿತ್ ಜಿಯೆಲ್ಯಾರ್ ಸೊಭಿತ್’ ಉತ್ರಾಂಚೊ ಧ್ಯೇಯ್ ಜಾವ್ನ್ ಜೂನ್ 7 ತಾರೀಕೆರ್, ಆಯ್ತಾರಾ ಸಕಾಳಿಂಚಾ ಮೀಸಾ ವೆಳಾರ್ 2026-2027 ಶೈಕ್ಷಣಿಕ್ ವರ್ಸಾಕ್ ಕ್ರಿಸ್ತಾಂವ್ ಶಿಕ್ಷಣಾಚೆ ವರಸ್ ಉಗ್ತಾವಣ್ ಕೆಲೆಂ. ವಿಗಾರ್ ಬಾ| ಡೆನಿಸ್ ಡಿ’ಸೋಜಾನ್, ಕ್ರೀಸ್ತಿ ಶಿಕ್ಷಣ್ ಶಿಕೊವ್ಣ್ ದಿಂವ್ಚ್ಯಾ ಶಿಕ್ಷಕಾಂನಿ ಆನಿ ಫಿರ್ಗಜ್ ಮಂಡಳಿಚಾ ಮುಕೆಲ್ಯಾಂನಿ ಪವಿತ್ರ್ ಪುಸ್ತಕ್ ಮಾನಾಚಾ ಜಾಗ್ಯಾರ್ ದವ್ರುನ್ ಪವಿತ್ರ್ ಪುಸ್ತಕಾಕ್ ಮಾನ್ ಕೆಲೊ. ಜಶೆಂ ಝಡಾಂಕ್ ಉದಕ್ ದೀವ್ನ್ ಫಳ್ ಜೊಡ್ತಾಂವ್ ತಶೆಂ ಕ್ರೀಸ್ತಿ ಶಿಕ್ಷಣ್ ಜೊಡುನ್ ಭಾವಾರ್ಥಿ ಜಿಣಿ ಜಿಯೆಂವ್ಚೆ ದೆವಾಚಾ ಉತ್ರಾಂಚೊ ಫಳ್ ಜಾವ್ನಾಸಾ ಮ್ಹಳ್ಳೊ ಸಂಕೇತ್ ಜಾವ್ನ್ ಝಡಾಂಕ್ ಉದಾಕ್ ವೊತುನ್ ಭಾವಾಡ್ತಿ ಶಿಕ್ಷಣಾಚೆ ವರಸ್ ಉಗ್ತಾವಣ್ ಕೆಲೆಂ. ಉಪ್ರಾಂತ್ ಶಿಕ್ಷಣ್ ಜೊಡ್ಚ್ಯಾ ವಿದ್ಯಾರ್ಥಿಂನಿ, ಕ್ರೀಸ್ತಿ ಶಿಕ್ಷಣ್ ದಿಂವ್ಚ್ಯಾ ಶಿಕ್ಷಕಾಂನಿ ಆನಿ ಸರ್ವ್ ಲೊಕಾನ್ ವಿಗಾರಾ ಸಾಂಗಾತಾ ಮೀಸಾಚೆ ಬಲಿದಾನ್ ಭೆಟಯ್ಲೆಂ.