ನವೊ ವಿಗಾರ್ ಬಾ| ಡೆನ್ನಿಸ್ ಡಿ’ಸೋಜಾಕ್ ಫಿರ್ಗಜ್ಗಾರಾಂ ಥಾವ್ನ್ ಸ್ವಾಗತ್

By ByndoorchiZalak, Pics: Lawrence Fernandes, 12 May, 2026

ಬೈಂದೂರ್: ಕಾರ್ಕಳ್ ಪರಪ್ಪಾಡಿ, ನಿರ್ಮಲಪದವು ನಿತ್ಯಾಧರ್ ಸಾಯ್ಭಿಣಿಚೆ ಫಿರ್ಗಜೆ ಥಾವ್ನ್ ಬೈಂದೂರ್ ಫಿರ್ಗಜೆಕ್ ವರ್ಗ್ ಜಾವ್ನ್ ಆಯಿಲ್ಲ್ಯಾ ನವೊ ವಿಗಾರ್ ಬಾ| ಡೆನ್ನಿಸ್ ಡಿ’ಸೋಜಾಕ್ ಬೈಂದೂರ್ ಫಿರ್ಗಜೆಚಾ ದೇವ್ ಪ್ರಜೆನ್ ಬರೊ ಯೆವ್ಕಾರ್ ಮಾಗೊನ್ ಸ್ವಾಗತ್ ಕೆಲೆಂ. ಬಾ| ಡೆನ್ನಿಸ್ ಡಿ’ಸೋಜಾಕ್ ಪ್ರಸ್ತುತ್ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊನ್ ಫುಲಾಂಚೊ ಹಾರ್ ಘಾಲುನ್ ದೇವ್ ಮಂದಿರಾಂತ್ ಯೆವ್ಕಾರ್ ಮಾಗ್ಲೊ, ತಶೆಂಚ್ ಕೊವೆತಾಂಚಿ ವ್ಹಡಿಲ್ನ್ ಸಿ| ಆನ್ಸಿ ಪಾವ್ಲ್, ಫಿರ್ಗಜ್ ಉಪಾಧ್ಯಕ್ಷ್ ಸ್ತೇಫಾನ್ ಡಾಯಸ್, ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್, ಆಯೋಗಾಂಚಿ ಸಂಚಾಲಕಿ ಜೊಸ್ಪಿನ್ ರೊಡ್ರಿಗಸಾನ್ ನವ್ಯಾ ವಿಗಾರಾಕ್ ಫುಲಾಂಚೊ ತುರೊ ದೀವ್ನ್ ಸ್ವಾಗತ್ ಕೆಲೆಂ.
ಉಪ್ರಾಂತ್ ಪವಿತ್ರ್ ವೇದಿಚೆರ್ ಬಿಸ್ಪಾಚೊ ಪ್ರತಿನಿಧಿ ಜಾವ್ನ್ ಕುಂದಾಪುರ್ ವಾರಾಡೊ ವಿಗಾರ್ ಬಾ| ಪಾವ್ಲ್ ರೇಗೊಚಾ ನೀರ್ದೆಶನಾಖಾಲ್ ನಿರ್ಗಮನ್ ಜಾಂವ್ಚೊ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊನ್ ನವೊ ವಿಗಾರ್ ಬಾ| ಡೆನ್ನಿಸ್ ಡಿ’ಸೋಜಾಕ್ ಪವಿತ್ರ್ ಪುಸ್ತಕ್ ದೀವ್ನ್ ವಿಗಾರಾಚಾ ಸೆವೆಸ್ಥಾನಾಚೊ ಅಧಿಕಾರ್ ಹಸ್ತಾಂತರ್ ಕೆಲೆಂ. ಫಿರ್ಗಜ್ ಗೊವ್ಳಿಕ್ ಮಂಡಳಿ ಉಪಾಧ್ಯಕ್ಷ್ ಸ್ತೇಫಾನ್ ಡಾಯಸಾನ್ ಫಿರ್ಗಜೆಚಿ ದಸ್ತಾವೇಜ್ ಪತ್ರಾಂ ನವ್ಯಾ ವಿಗಾರಾಕ್ ಹಸ್ತಾಂತರ್ ಕೆಲೆಂ. ಫಿರ್ಗಜ್ ಲೊಕಾಂ ತರ್ಫೆನ್ ಫಿರ್ಗಜ್ ಗೊವ್ಳಿಕ್ ಮಂಡಳಿಚಾ ಸಾಂದ್ಯಾನಿ ವಾತ್ ಪೆಟವ್ನ್ ನವ್ಯಾ ವಿಗಾರಾಕ್ ತಾಂಚೊ ಸಂಪೂರ್ಣ್ ಸಹಕಾರಾಚಿ ಭಾಸವ್ಣಿಂ ಕೆಲೆಂ.
ಸ್ವಾಗತ್ ಆನಿ ಅಭಿನಂದನ್ ಕಾರ್ಯಕ್ರಮಾಂತ್ ಫಿರ್ಗಜ್ ಮಂಡಳಿ ಉಪಾಧ್ಯಕ್ಷ್, ಕಾರ್ಯದರ್ಶಿ, ಆಯೊಗಾಂಚಿ ಸಂಚಾಲಕಿ, ವಾಡ್ಯಾಚೆ ಗುರ್ಕಾರ್ ಆನಿ ಸಂಘ್-ಸಂಸ್ಥ್ಯಾಚಾ ಮುಕೆಲ್ಯಾಂನಿ ನವೊ ವಿಗಾರ್ ಬಾ| ಡೆನ್ನಿಸ್ ಡಿ’ಸೋಜಾಕ್ ಗುಲೊಬ್ ದೀವ್ನ್ ಅಭಿನಂದನ್ ಪಾಟಯ್ಲೆಂ.
ಬಾ| ಡೆನ್ನಿಸ್ ಡಿ’ಸೋಜಾನ್ ಬೈಂದೂರ್ ಫಿರ್ಗಜೆಚೆ ಸೆವೆಸ್ಥಾನ್ ಸ್ವೀಕಾರ್ ಕರ್ಚ್ಯಾ ಸಂದರ್ಭಿ ಕಾರ್ಕಳ್ ವಾರಾಡೊ ವಿಗಾರ್ ಮಾ| ಆಲ್ಬನ್ ಡಿ’ಸೋಜಾ, ಬಾ| ರೋಮನ್ ಮಸ್ಕರೆನ್ಹಸ್, ಬಾ| ಹೆರಾಲ್ಡ್ ಪಿರೇರಾ, ಬಾ| ಅಶ್ವಿನ್ ಆರಾನ್ಹಾ, ಬಾ| ಎಡ್ವಿನ್ ಡಿ’ಸೋಜಾ, ಬಾ|ವಿಶಾಲ್ ಲೋಬೊ, ಬಾ| ನೆಲ್ಸನ್ ರೆಬೆರೊ ಆನಿ ಬಾ| ಮ್ಯಾಪ್ಲಿನ್ ಲೋಬೊ ಹಾಜರ್ ಆಸ್‍ಲ್ಲಿಂ.
ಕಾರ್ಯಕ್ರಮಾಕ್ ಸ್ತೇಫಾನ್ ಡಾಯಸಾನ್ ಸ್ವಾಗತ್ ಮಾಗ್ಲೆಂ ಆನಿ ವೀಣಾ ಫೆರ್ನಾಂಡಿಸಾನ್ ಕಾರ್ಯಕ್ರಮ್ ಚಲವ್ನ್ ವ್ಹೆಲೆಂ.