ವಿಗಾರ್ ಬಾಪ್ ವಿನ್ಸೆಂಟ್ ಕುವೆಲ್ಲೊಕ್ ಮೊಗಾಚೊ ವಿದಾಯ್

By ByndoorchiZalak, Pics: Lawrence Fernandes, 10 May, 2026

ಬೈಂದೂರ್: ಬೈಂದೂರ್ ಫಿರ್ಗಜೆಂತ್ ಪಾಟ್ಲ್ಯಾ ಸಾತ್ ವರ್ಸಾಂ ಥಾವ್ನ್ ಸೆವಾ ದೀವ್ನ್ ಆಪ್ಲ್ಯಾ ಮುಕ್ಲ್ಯಾ ಮಿಸಾಂವ್ ವಾವ್ರಾಕ್ ಮುದರಂಗಡಿ ಫಿರ್ಗಜೆಕ್ ವರ್ಗ್ ಜಾವ್ನ್ ವೆಚಾ ಸಂದರ್ಭಿ ವಿಗಾರ್ ಬಾಪ್ ವಿನ್ಸೆಂಟ್ ಕುವೆಲ್ಲೊಕ್ ಫಿರ್ಗಜ್ ದೇವ್ ಪ್ರಜೆ ಥಾವ್ನ್ ಧಿನ್ವಾಸ್ ಪಾಟವ್ಣಿಂ ಆನಿ ಆದೇವ್ಸ್ ಕಾರ್ಯಕ್ರಮ್ ಮೇ 10 ತಾರೀಕೆರ್ ಆಯ್ತಾರಾ ಸಕಾಳಿಂ ಫಿರ್ಗಜೆಚಾ ಸಮುದಾಯ್ ಭವನಾಂತ್ ಚಲ್ಲೆಂ.
ಕಾರ್ಯಕ್ರಮಾಂತ್ ಬಾ| ನೆಲ್ಸನ್ ರೆಬೆರೊ, ಬಾ| ಮ್ಯಾಪ್ಲಿನ್ ಲೋಬೊ, ಸಿ| ಆನ್ಸಿ ಪಾವ್ಲ್, ಫಿರ್ಗಜ್ ಗೊವ್ಳಿಕ್ ಮಂಡಳಿ ಉಪಾಧ್ಯಕ್ಷ್ ಸ್ತೇಫಾನ್ ಡಾಯಸ್, ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್, ಆಯೋಗಾಂಚಿ ಸಂಚಾಲಕಿ ಜೊಸ್ಪಿನ್ ರೊಡ್ರಿಗಸ್ ವೆದಿಚೆರ್ ಹಾಜರ್ ಆಸ್‍ಲ್ಲಿಂ.
ಕಾರ್ಯದರ್ಶಿನ್ ಪಾಟ್ಲ್ಯಾ ಸಾತ್ ವರ್ಸಾಂ ಬೈಂದೂರ್ ಫಿರ್ಗಜೆಕ್ ವಿಗಾರಾನ್ ದಿಲ್ಲ್ಯಾ ಸೆವೆಕ್ ಉಪ್ಕಾರ್ ಬಾವ್ಡುನ್ ಮಾನ್ ಪತ್ರ್ ವಾಚುನ್ ವಿಗಾರಾಕ್ ಅರ್ಪಿಲೆಂ. ಉಪಾಧ್ಯಕ್ಷ್ ಸ್ತೇಫಾನ್ ಡಾಯಸಾನ್ ವಿಗಾರಾಕ್ ಶೊಲ್ ಪಾಂಗ್ರುನ್ ಸನ್ಮಾನ್ ಕೆಲೆಂ ಆನಿ ಫಿರ್ಗಜ್ ಮಂಡಳಿ ಆನಿ ಸರ್ವ್ ಗುರ್ಕಾರಾಂನಿ ವಿಗಾರಾಕ್ ಬರೆಂ ಮಾಗೊನ್ ಉಗ್ಡಾಸಾಚಿ ಕಾಣಿಕ್ ಅರ್ಪಣ್ ಕೆಲೆಂ. ವಿಗಾರ್ ಬಾಪ್ ವಿನ್ಸೆಂಟ್ ಕುವೆಲ್ಲೊನ್ ಫಿರ್ಗಜೆಂತ್ ಹ್ಯಾ ಸಾತ್ ವರ್ಸಾಂನಿ ದಿಲ್ಲಿಂ ಸೆವಾ ವಿವರಣ್ ಕರುನ್ ಸರ್ವ್ ಯೋಜನಾಂ ಸುಫಳ್ ಕರುಂಕ್ ಆನಿ ವಯುಕ್ತಿಕ್ ಗರ್ಜಾಂಕ್ ಕುಮಕ್ ಕರುನ್ ಆಧಾರ್ ದಿಲ್ಲ್ಯಾ ಫಿರ್ಗಜ್ ಲೊಕಾಂಚೊ ಉಪ್ಕಾರ್ ಬಾವುಡ್ಲೊ. ಫಿರ್ಗಜ್ ದೇವ್ ಪ್ರಜೆನ್ ವಿಗಾರಾಕ್ ಬರೆಂ ಮಾಗೊನ್ ಮೊಗಾಚೊ ಆದೇವ್ಸ್ ಮಾಗ್ಲೊ.