Reported by ICYM/YCS, Byndoor, Pics: Lawrence Fernandes, 24th August, 2025
ಬೈಂದೂರ್: ಆಯ್ತಾರಾ, ಅಗೋಸ್ತ್ 24 ತಾರೀಕೆರ್ ಫಿರ್ಗಜೆಚಾ ಸಮುದಾಯ್ ಭವನ್ ಹೊಲಾಂತ್ ಐ.ಸಿ.ವೈ.ಎಮ್. ಆನಿ ವೈ.ಸಿ.ಎಸ್. ಸಂಘಟನಾಚಾ ಸಾಂಗಾತ್ಪಣಾರ್ ಫಿರ್ಗಜೆಚಾ ಲೊಕಾನ್ ವ್ಹಡಾ ಸಂಭ್ರಮಾನ್ ಕೊಂಕ್ಣಿ ಮಾನ್ಯತಾ ದಿವಸ್ ಆಚರಣ್ ಕೆಲೆಂ. ವೆದಿ ಕಾರ್ಯಕ್ರಮಾಂತ್ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊ, ದಿಯಾಕೊನ್ ಪೃಥ್ವಿ ರೊಡ್ರಿಗಸ್, ಕೊವೆಂತಾಚಿ ವ್ಹಡಿಲ್ನ್ ಸಿ| ಆನ್ಸಿ ಪಾವ್ಲ್, ಫಿರ್ಗಜ್ ಮಂಡಳಿ ಉಪಾಧ್ಯಕ್ಷ್ ಸ್ತೇಫಾನ್ ಡಾಯಸ್, ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್, ಆಯೋಗಾಂಚಿ ಸಂಯೋಜಕಿ ಅನಿತಾ ನಜ್ರೆತ್, ಐ.ಸಿ.ವೈ.ಎಮ್. ಸಚೇತಕ್ ಪ್ರದೀಪ್ ಫೆರ್ನಾಂಡಿಸ್, ವೈ.ಸಿ.ಎಸ್. ಸಚೇತಕಿ ಆಶಾ ವೀಣಾ ಡಾಯಸ್, ಐ.ಸಿ.ವೈ.ಎಮ್. ಅಧ್ಯಕ್ಷ್ ಎಲ್ಸನ್ ಡಿ’ಸೋಜಾ, ಕಾರ್ಯದರ್ಶಿ ಡಿಯೋನ್ ಡಾಯಸ್, ವೈ.ಸಿ.ಎಸ್. ಅಧ್ಯಕ್ಷ್ ಆಲಿಸ್ಟನ್ ನಜ್ರೆತ್, ಕಾರ್ಯದರ್ಶಿ ಜೀನಲ್ ಫೆರ್ನಾಂಡಿಸ್ ಹಾಜರ್ ಆಸ್ಲ್ಲಿಂ. ಐ.ಸಿ.ವೈ.ಎಮ್. ಆನಿ ವೈ.ಸಿ.ಎಸ್. ಸಂಘಟನಾಚಾ ತರ್ಫೆನ್ ಸರ್ವ್ ಸಾಂದ್ಯಾಂನಿ ಫಿರ್ಗಜ್ಗಾರಾಂಕ್ ಪಾನ್-ಪೊಡ್, ಉದಕ್ ದೀವ್ನ್ ಸ್ವಾಗತ್ ಕೆಲೆಂ.
ವಿಗಾರ್ ಬಾಪಾಂನಿ ಕೊಂಕ್ಣಿ ಮಾನ್ಯತಾ ದಿವಸಾಚೊ ಬಾವ್ಟೊ ಉಬಾರ್ನ್ ಕೊಂಕ್ಣಿ ಮಾನ್ಯತಾ ದಿವಸ್ ಆನಿ ಕೊಂಕ್ಣಿ ಭಾಶೆ ಥಂಯ್ ಆಮ್ಚೊ ಅಭಿಮಾನ್ ಹ್ಯಾ ವಿಶಿಂ ಉತ್ರಾಂ ಉಲವ್ನ್ ಸಂದೇಶ್ ದಿಲೆಂ. ಉಪ್ರಾಂತ್ ಸರ್ವ್ ವಾಡ್ಯಾಗಾರಾಂನಿ ವಿವಿಧ್ ಕೊಂಕ್ಣಿ ಸಾಂಸ್ಕೃತಿಕ್ ಕಾರ್ಯಕ್ರಮ್ ಪ್ರದರ್ಶನ್ ಕೆಲೆಂ. ಕಾರ್ಯ್ರಕ್ರಮ್ ಮಾಲ್ಗಡ್ಯಾಂಚಾ ಕೊಂಕ್ಣಿ ಸಂಸ್ಕೃತಿ ರಿತಿ-ರಿವಾಜ್ ವಾಪರ್ನ್, ಕೊಂಕ್ಣಿ ಭಾಶೆಚೊ ಅಭಿಮಾನ್ ವ್ಯಕ್ತ್ ಕರುನ್ ಬೋವ್ ಶಿಸ್ತೆನ್ ಆಚರಣ್ ಕೆಲೆಂ.
