Reported by Rajesh Quadras, Pics: Lawrence Fernandes, 3rd August, 2025
ಬೈಂದೂರ್: ಸ್ವಂತ್ ಉದ್ಯಮ್ ಚಲವ್ನ್ ನವ್ಯಾಂ ಚಿಂತ್ಪಾಂನಿಂ ವ್ಯವಹಾರ್ ಚಲವ್ನ್ ಸಾಂಗಾತಾ ಸಮಾಜೆಂತ್ ಸಹಕಾರ್ ದೀವ್ನ್ ವಾವುರ್ತೆಲ್ಯಾ ಫಿರ್ಗಜೆಚಾ ‘ಉದ್ಯಮಿಂಚೊ ಜುಬ್ಲೆವ್’ ಆಯ್ತಾರಾ, ಅಗೋಸ್ತ್ 3 ತಾರಿಕೆರ್ ಸಕಾಳಿಂಚಾ ಮಿಸಾ ಉಪ್ರಾಂತ್ ವಾವ್ರಾ ಆಯೋಗಾಚಾ ಮುಕೇಲ್ಪಣಾರ್ ಮಾಂಡುನ್ ಹಾಡ್ಲೆಂ. ವಿಗಾರ್ ಬಾಪಾಂನಿ ಸಮೇಸ್ತ್ ಉದ್ಯಮಿಂ ಪಾಸತ್ ವಿಶೇಸ್ ಪ್ರಾರ್ಥನ್ ಕರುನ್ ದೆವಾಚೊ ಆಶೀರ್ವಾದ್ ಮಾಗೊನ್ ಬಲಿದಾನ್ ಭೆಟಯ್ಲೆಂ.
ಉಪ್ರಾಂತ್ ಮಿನಿ ಹೊಲಾಂತ್ ಮಾಂಡುನ್ ಹಾಡ್ಲ್ಲ್ಯಾ ಕಾರ್ಯಕ್ರಮಾಂತ್ ವಿವಿಧ್ ವಾವ್ರಾ ಶೆತಾಂತ್ ವಾವುರ್ತೆಲ್ಯಾ ಫಿರ್ಗಜೆಚಾ ಉದ್ಯಮಿಂಚಿ ವ್ಯಕ್ತಿ ಪರಿಚಯ್ ಆನಿ ತಾಂಚೆ ಉದ್ಯಮ್ ಚಲವ್ನ್ ಆಯಿಲ್ಲಿ ವರ್ಸಾಂ, ಪ್ರತ್ಯೇಕ್ ಜಾವ್ನ್ ಲಾಂಬ್ ಕಾಳಾ ಥಾವ್ನ್ ಉದ್ಯಮ್ ಚಲಯಿಲ್ಲ್ಯಾ ಉದ್ಯಮಿಂಕ್ ಶಾಬಾಸ್ಕಿ ಪಾಟವ್ನ್ ವಾವ್ರಾ ಆಯೋಗಾನ್ ವಿವರಣ್ ದಿಲೆಂ. ವಿಗಾರ್ ಬಾಪಾಂನಿ ಕಾರ್ಯಕ್ರಮಾಂತ್ ಹಾಜರ್ ಜಾಲ್ಲ್ಯಾ ಉದ್ಯಮಿಂಕ್ ಶೊಲ್ ಪಾಂಗ್ರುನ್ ಸನ್ಮಾನ್ ಕೆಲೆಂ. ಸನ್ಮಾನ್ ಸ್ವೀಕಾರ್ ಕೆಲ್ಲ್ಯಾ ಉದ್ಯಮಿನಿಂ ತಾಂಚಿ ಭೊಗ್ಣಾಂ ವಾಂಟುನ್ ಘೆತ್ಲಿಂ.
ವೇದಿ ಕಾರ್ಯಕ್ರಮಾಚೆ ಅಧ್ಯಕ್ಷ್ಪಣ್ ಘೆತ್ಲ್ಲ್ಯಾ ವಿಗಾರ್ ಬಾಪಾಂನಿ ಸ್ವಂತ್ ಉದ್ಯಮ್ ಚಲವ್ನ್ ವಾವ್ರ್ ಕರ್ಚ್ಯಾ ಉದ್ಯಮಿಂಕ್ ತಾಂಚಾ ಮಿನ್ಹತೆಕ್ ವಾವ್ರಾಚೊ ಫಳ್ ಮೆಳೊನ್ ತುಮ್ಚೆಂ ಉದ್ಯಮ್ ಯಶಸ್ವಿ ಜಾಂವ್ ಮ್ಹಣ್ ಶುಭಾಶಯ್ ಪಾಟವ್ನ್ ಸರ್ವ್ ಬರೆಂ ಮಾಗ್ಲೆಂ. ವೇದಿ ಕಾರ್ಯಕ್ರಮಾಂತ್ ವಿಗಾರ್ ಬಾ| ವಿನ್ಸೆಂಟ್ ಕುವೆಲ್ಲೊ, ಸಿ| ಆನ್ಸಿ ಪಾವ್ಲ್, ಫಿರ್ಗಜ್ ಮಂಡಳಿ ಉಪಾಧ್ಯಕ್ಷ್ ಸ್ತೇಫಾನ್ ಡಾಯಸ್, ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್ ಆನಿ ವಿವಿಧ್ ಆಯೋಗ್ ಸಂಯೋಜಕಿ ಅನಿತಾ ನಜ್ರೆತ್ ಹಾಜರ್ ಆಸ್ಲ್ಲಿಂ. ಸುಮಾರ್ 51 ಉದ್ಯಮಿಂ ಹಾಜರ್ ಜಾವ್ನ್ ಹ್ಯಾ ಕಾರ್ಯಕ್ರಮಾಂತ್ ಭಾಗ್ ಘೆತ್ಲ್ಲೆಂ. ವಾವ್ರಾ ಆಯೋಗಾನ್ ಉದ್ಯಮಿಂಚೆ ವ್ಯಾಪಾರ್ ವೃತ್ತಿ ವಿಷಯ್ ಆನಿ ವ್ಯಾಪಾರ್ ವೃತ್ತೆಚೆ ನಾಂವ್ Screenಚೆರ್ PPT Show ಕರುನ್ ಪರಿಚಯ್ ಕರುನ್ ದಿಲೆಂ.
ವಾವ್ರಾ ಆಯೋಗಾಚೊ ಸಂಚಾಲಕ್ ರಾಜೇಶ್ ಕ್ವಾಡ್ರಸಾನ್ ವೇದಿ ಕಾರ್ಯಕ್ರಮಾಂತ್ ಹಾಜರ್ ಜಾಲ್ಲ್ಯಾ ಸರ್ವಾಂಕ್ ಗುಲೊಬ್ ದೀವ್ನ್ ಸ್ವಾಗತ್ ಕರುನ್ ಸಾಂಗಾತಾ ಕಾರ್ಯಕ್ರಮಾಕ್ ಹಾಜರ್ ಜಾಲ್ಲ್ಯಾ ಸರ್ವಾಂಕ್ ಸ್ವಾಗತ್ ಕೆಲೆಂ, ಸಿರಿಲ್ ರೆಬೆರೊನ್ ಧನ್ಯಾವಾದ್ ಪಾಟಯ್ಲೆಂ ಆನಿ ರೊನಾಲ್ಡ್ ನಜ್ರೆತಾನ್ ಕಾರ್ಯಕ್ರಮ್ ಚಲವ್ನ್ ದಿಲೆಂ.
