By ByndoorchiZalak, Pics: Lawrence Fernandes, 01 May, 2025
ಬೈಂದೂರ್: ಬಾ| ವಿನ್ಸೆಂಟ್ ಕುವೆಲ್ಲೊಚೊ ಯಾಜಕೀ ದೀಕ್ಷೆಚೊ ರುಪ್ಯೋತ್ಸವ್ ಜುಬ್ಲೆವಾಚೊ ಸಂಭ್ರಮ್ ಫಿರ್ಗಜೆಚಾ ದೇವ್ ಪ್ರಜೆನ್ ವ್ಹಡಾ ಉಲ್ಲಾಸಾನ್ ಆಚರಣ್ ಕೆಲೆಂ. ಮೇ 1 ತಾರೀಕೆರ್ ಸಕಾಳಿಂ ಉಡುಪಿ ದಿಯೆಸೆಜ್ ಗೊವ್ಳಿಬಾಪ್ ಅ| ಮಾ| ದೊತೊರ್ ಜೆರಾಲ್ಡ್ ಐಸಾಕ್ ಲೋಬೊಕ್ ಫಿರ್ಗಜೆಕ್ ಸ್ವಾಗತ್ ಕರುನ್ 10 ವೊರಾರ್ ಗೊವ್ಳಿ ಬಾಪ್, ಉಡುಪಿ ದಿಯೆಸೆಜಿಚೊ ಮೊನ್ಸಿಂಜೊರ್ ಆನಿ ಬೈಂದೂರ್ ಫಿರ್ಗಜೆಚೊ ಆದ್ಲೊ ವಿಗಾರ್ ಬಾ| ಫರ್ಡಿನಾಂಡ್ ಗೊನ್ಸಾಲ್ವಿಸ್, ವಾರಾಡ್ಯಾಚಿ ಆನಿ ದಿಯೆಸೆಜಿಚೆ ಹೇರ್ ಯಾಜಕಾ ಸಾಂಗಾತಾ ಸಂಭ್ರಮೀಕ್ ಮೀಸಾಚೆ ಬಲಿದಾನ್ ಚಲ್ಲೆಂ. ಬಾ| ರೊಯಲ್ ನಜ್ರೆತಾನ್ ಬಾ| ವಿನ್ಸೆಂಟಾಂಚಿ ಯಾಜಕೀ ಜಿವಿತಾಂತ್ ಪಂಚ್ವೀಸ್ ವರ್ಸಾಂ ಸಂಪ್ಲಿ ತರೀ ದೇವ್ ಆಜೂನೀ ತಾಂಚಾ ವ್ಯಕ್ತಿತ್ವಾಕ್ ಏಕ್ ನಾಜೂಕಾಯೆಚೆ ರೂಪ್ ದೀವ್ನ್ ಆಪ್ಲ್ಯಾ ಮಿಸಾವಾಂಚೆ ಹಾತೆರ್ ಕರ್ನ್ ವಾಪಾರುನ್ ಆಸಾ ಮ್ಹಣ್ ಬಾ| ವಿನ್ಸೆಂಟಾಂಚಿ ಯಾಜಕೀ ಜಿಣಿಯೆಚೊ ತ್ಯಾಗಾಚೊ ಸಾಕ್ರಿಫಿಸ್ ನಿಯಾಳ್ ಕರುನ್ ಪವಿತ್ರ್ ಪುಸ್ತಕಾಚಾ ಉತ್ರಾಂಚೆರ್ ಸಂದೇಶ್ ದಿಲೊ.
ಉಪ್ರಾಂತ್ ಫಿರ್ಗಜೆಚಾ ಸಮುದಾಯ್ ಭವನಾಂತ್ ಬಾ| ವಿನ್ಸೆಂಟ್ ಕುವೆಲ್ಲೊಕ್ ಉಲ್ಲಾಸ್ ಪಾಟಂವ್ಚೆ ಕಾರ್ಯಕ್ರಮ್ ಚಲ್ಲೆಂ. ಹ್ಯಾ ಕಾರ್ಯಕ್ರಮಾಂತ್ ಬಾ| ವಿನ್ಸೆಂಟ್ ಕುವೆಲ್ಲೊ ಸಾಂಗಾತಾ ಗೊವ್ಳಿಬಾಪ್ ಅ| ಮಾ| ದೊತೊರ್ ಜೆರಾಲ್ಡ್ ಐಸಾಕ್ ಲೋಬೊ, ಬಾ| ವಿನ್ಸೆಂಟ್ ಕುವೆಲ್ಲೊಚಿ ಆವಯ್ ಫ್ಲೋರಿನ್ ಕುವೆಲ್ಲೊ, ಉಡುಪಿ ದಿಯೆಸೆಜ್ ಜುಡಿಶಿಯಲ್ ವಿಗಾರ್ ದೊ| ಬಾಪ್ ರೋಶನ್ ಡಿ’ಸೋಜಾ, ಕುಂದಾಪುರ್ ವಾರಾಡೊ ವಿಗಾರ್‌ವಾರ್ ಬಾ| ಪಾವ್ಲ್ ರೇಗೊ, ಪಿಯುಸ್‌ನಗರ್ ಫಿರ್ಗಜೆಚೊ ವಿಗಾರ್ ಬಾ| ಆಲ್ಬರ್ಟ್ ಕ್ರಾಸ್ತಾ, ಕೊವೆಂತಾಚಿ ವ್ಹಡಿಲ್ನ್ ಸಿ| ಆನ್ಸಿ ಪಾವ್ಲ್, ಫಿರ್ಗಜ್ ಮಂಡಳಿ ಉಪಾಧ್ಯಕ್ಷ್ ಸ್ತೇಫಾನ್ ಡಾಯಸ್, ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್ ಆನಿ ಆಯೋಗಾಂಚಿ ಸಂಯೋಜಕಿ ಅನಿತಾ ನಜ್ರೆತ್ ವೆದಿಚೆರ್ ಹಾಜರ್ ಆಸ್‍ಲ್ಲಿಂ. ವೆದಿಚೆರ್ ವಿಗಾರಾನ್ ಕೇಕ್ ಕಾತರ್ನ್ ಆಪ್ಲ್ಯಾ ಯಾಜಕೀ ರುಪ್ಯೋತ್ಸವ್ ಜುಬ್ಲೆವಾಚೊ ಸಂತೊಸ್ ವ್ಯಕ್ತ್ ಕೆಲೊ. ಪಿಯುಸ್‌ನಗರ್ ಫಿರ್ಗಜೆಚೊ ವಿಗಾರ್ ಬಾ| ಆಲ್ಬರ್ಟ್ ಕ್ರಾಸ್ತಾನ್ ಬಾ| ವಿನ್ಸೆಂಟ್ ಕುವೆಲ್ಲೊಚಿ ಜಿಣಿಯೆಚಿ ಪರಿಚಯ್ ಆನಿ ತಾಚಾ ಮಿಸಾಂವ್ ವಾವ್ರಾಚಿ ವಿವರಣ್ ದೀವ್ನ್ ಬರೆಂ ಮಾಗೊನ್ ಉಲ್ಲಾಸ್ ಪಾಟಯ್ಲೆಂ. ಫಿರ್ಗಜೆಚಾ ಗಾಯನ್ ಮಂಡಳಿನ್ ಉಲ್ಲಾಸಾಚೆ ಗೀತ್ ಗಾವ್ನ್ ವಿಗಾರಾಕ್ ಅಭಿನಂದನ್ ಪಾಟಯ್ಲೆಂ. ಕುಂದಾಪುರ್ ವಾರಾಡೊ ವಿಗಾರ್‌ವಾರ್ ಬಾ| ಪಾವ್ಲ್ ರೇಗೊನ್ ಬಾ| ವಿನ್ಸೆಂಟ್ ಕುವೆಲ್ಲೊ ಖಾಲ್ತೊ, ಭೊಳೊ ಆನಿ ಸಾದೊ ಯಾಜಕ್ ಜಾವ್ನ್ ಹ್ಯಾ ತೀನ್ ಉತ್ರಾಂತ್ ತಾಚಿ ವ್ಯಕ್ತಿತ್ವ್ ಆಟಾಪುನ್ ಆಸೊನ್, ಏಕ್ ಬರೊ ಮೊಗಾಳ್ ಯಾಜಕ್ ಬೈಂದೂರ್ ಫಿರ್ಗಜೆಕ್ ಮೆಳ್ಳಾ ಆನಿ ತಾಚೆ ರುಪ್ಯೋತ್ಸವ್ ಆಚರಣ್ ಕೆಲ್ಲ್ಯಾ ಬೈಂದೂರ್ ಫಿರ್ಗಜ್ಗಾರಾಂಕ್ ಉಲ್ಲಾಸ್ ಪಾಟಯ್ಲೆಂ. ಫಿರ್ಗಜ್ಗಾರಾಂ ತರ್ಫೆನ್ ಗೊವ್ಳಿಬಾಪಾಂನಿ ಬಾ| ವಿನ್ಸೆಂಟ್ ಕುವೆಲ್ಲೊಕ್ ಶೊಲ್ ಪಾಂಗ್ರುನ್ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಸನ್ಮಾನ್ ಕೆಲೆಂ. ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸಾನ್ ಮಾನ್ ಪತ್ರ್ ವಾಚುನ್ ಮಾನ್ ಪತ್ರ್ ವಿಗಾರಾಕ್ ಅರ್ಪಿಲೆಂ. ಬಾ| ವಿನ್ಸೆಂಟ್ ಕುವೆಲ್ಲೊಚಿ ಆವಯ್ ಫ್ಲೋರಿನ್ ಕುವೆಲ್ಲೊಕ್ ಫಿರ್ಗಜ್ಗಾರಾಂ ತರ್ಫೆನ್ ಬಾ| ವಿನ್ಸೆಂಟ್ ಕುವೆಲ್ಲೊನ್ ಶೊಲ್ ಪಾಂಗ್ರುನ್ ಗೌರವ್ ಪಾಟಯ್ಲೆಂ. ವಿವಿಧ್ ಸಂಘ್ ಸಂಸ್ಥ್ಯಾಚಾ ಮುಕೆಲ್ಯಾಂನಿ ಆನಿ ವಾಡ್ಯಾಚಾ ಗುರ್ಕಾರಾಂನಿ ವಿಗಾರಾಕ್ ಫುಲಾಂ ದೀವ್ನ್ ಬಾ| ವಿನ್ಸೆಂಟ್ ಕುವೆಲ್ಲೊಕ್ ಉಲ್ಲಾಸ್ ಪಾಟಯ್ಲೆಂ. ಬಾ| ವಿನ್ಸೆಂಟ್ ಕುವೆಲ್ಲೊನ್ ಆಪ್ಲ್ಯಾ ಯಾಜಕೀ ರುಪ್ಯೋತ್ಸವಾಚಾ ಸಂದರ್ಭಿ ಆಪ್ಲಿ ಭೊಗ್ಣಾಂ ಉಚಾರ್ಲಿಂ. ಗೊವ್ಳಿಬಾಪ್ ಅ| ಮಾ| ದೊತೊರ್ ಜೆರಾಲ್ಡ್ ಐಸಾಕ್ ಲೋಬೊ ಬಾ| ವಿನ್ಸೆಂಟ್ ಕುವೆಲ್ಲೊಕ್ ಬರೆಂ ಮಾಗೊನ್ ಆನಿ ಸಂಭ್ರಮ್ ಆಚರಣ್ ಕೆಲ್ಲ್ಯಾ ಬೈಂದೂರ್ ಫಿರ್ಗಜ್ಗಾರಾಂಕ್ ಅಭಿನಂದನ್ ಪಾಟಯ್ಲೆಂ.
ಕಾರ್ಯಕ್ರಮಾಕ್ ಫಿರ್ಗಜ್ ಮಂಡಳಿ ಉಪಾಧ್ಯಕ್ಷ್ ಸ್ತೇಫಾನ್ ಡಾಯಸಾನ್ ಸ್ವಾಗತ್ ಕೆಲೆಂ, ಆಯೋಗಾಂಚಿ ಸಂಯೋಜಕಿ ಅನಿತಾ ನಜ್ರೆತಾನ್ ಜುಬ್ಲೆವ್ ಸಂಭ್ರಮಾಕ್ ಹಾಜರ್ ಜಾಲ್ಲ್ಯಾ ಮಾನೇಸ್ತಾಂಕ್ ಆನಿ ಆಧಾರ್ ದಿಲ್ಲ್ಯಾ ಸರ್ವಾಂಕ್ ಧನ್ಯವಾದ್ ಪಾಟಯ್ಲೆಂ ಆನಿ ಜೊಸೇಫ್ ರೊಡ್ರಿಗಸ್ ಬಾಪಾಂನಿ ಕಾರ‍್ಯೆಂ ಚಲವ್ನ್ ದಿಲೆಂ.
