[ಪವಿತ್ರ್ ಪುಸ್ತಕಾಂತ್ ಜೆರುಜಲೆಮಾವಿಶಿಂ ಜಾಯ್ತ್ಯೊ ಸಂಗ್ತೀ ಆಯ್ಕೊಂಕ್ ಮೆಳ್ತಾ. ಜೆಜು ಸಂಸಾರಿ ಆಸ್ತಾನಾ ದೆವಾಚ್ಯಾ ರಾಜ್ಯಾಚಿ ಖಬರ್ ಪರ್ಗಟ್ನೆಚಾ ವೆಳಾ, ಆಪ್ಲ್ಯಾ ನಿಮಾಣ್ಯಾ ಘಡಿಯೆಚಾ ವೆಳಾ ಆನಿ ಜಿವಂತ್ ಜಾಲ್ಯಾ ಉಪ್ರಾಂತ್ ಜೆರುಜಲೆಮ್ ಶಹರಾಂತ್ ಜಾಯ್ತ್ಯೊ ಸಂಗ್ತೀ ಘಡ್ಲ್ಯೊ. ಅನಿಲ್ ಬೈಂದೂರ್ ಆಪ್ಲೊ ವಾವ್ರಾ ಥಳ್ ಇಸ್ರಾಯೆಲಾ ಥಾವ್ನ್ ಆತಾಂಚಾ ಜೆರುಜಲೆಮ್ ಶಹರಾವಿಶಿಂ ಲಾಗ್ಶಿಲ್ಯಾನ್ ಜಾಣಾಸೊನ್ ಪವಿತ್ರ್ ಶಹರ್ ಜೆರುಜಲೆಮ್ ಆನಿ ಜೆಜುಚೊ ಸಂಬಂಧಾ ವಿಶಿಂ ಗೂಂಡ್ ಉತ್ರಾಂನಿ ವಿಣ್‍ಲ್ಲಿಂ ತಾಚಿ ಆಪುರ್ಬಾಯೆಚಿ ಕವಿತಾ ಜಾವ್ನಾಸಾ.]
– ಡೊಲ್ಫಿ ನಜ್ರೆತ್
ಜೆರುಜಲೆಮಾ
ಕಿತ್ಲಿ ದೀಷ್ಟ್
ಬೊವ್ಡೊಂ ತುಜೆರ್
ಎ ಜೆರುಜಲೆಮಾ .
ಹ್ಯಾ ಪವಿತ್ರ್ ಶ್ಹೆರಾಚ್ಯಾ
ಕಾಳ್ಜಾ ಭಿತರ್ ಗೆಲ್ಲೆ ತಿತ್ಲೆಚ್
ಭಾಯ್ಲ್ಯಾನ್ ಪವಿತ್ರ್ ಸುಂದರ್
ಉಲ್ಲಾಸಿಲ್ಲೆಯ್ ತುಂ
ಪಯ್ಶಿಲ್ಯಾ ಬೆಲೆಯಾಂತ್
ಸಂಸಾರಾಚೊ ಬಾಳ್ ಸಡ್ವೊಣ್ದಾರ್ ಜಲ್ಮತಾನಾ ..
ರಡ್ಣ್ಯಾ ವಿಳಾಪಾನಿ ಸುಸ್ಕಾರ್ಲೆಯ್ ತುಂ
ತುಜ್ಯಾಚ್ ಗರ್ಭಾಂತ್ ತಾಕಾ ನಿಕೆಪಿತಾನಾ ..
ದೆವಾಚಿ ದೀಶ್ಟ್
ತುಜ್ಯಾ ಆಂಗ್ಣಾರ್ ಪ್ರಕಾಸುನ್
ಧರ್ಮಾಚೆ ಇತಿಹಾಸ್ ಉಗಡ್ತಾನಾ
ತಿತೀನ್ ವಾಂಟ್ಯಾನಿಂ
ತುಜೆ ಆಂಗಾಣ್ ಭೆಸಾಂ ಜಾಲೆ ..
ಆತಾಂ ಹರ್ಯೆಕ್ಲ್ಯಾಚೆಂ
ತುಂ ತಾಂಚೆ ಮ್ಹಳ್ಳೊ ವಾದ್ ...
ಎ ಭಾಗಿ ಜೆರುಜಲೆಮಾ
ದೈವಿಕ್ ಪುತಾಚಿ
ಪಾಂಯಾಂಚಿ ಮ್ಹೊರ್
ತುಜ್ಯಾ ಧರ್ತೆನ್ ವ್ಹಾವಯಲ್ಲಿ ...
ತುಜ್ಯಾ ಚರಿತ್ರೆಚಿ ಪಾನಾಂ
ಆಜೂನ್ ಯಿ ಸಾಕ್ಸ್ ದಿತಾತ್ ..
ತಾಚೆ ಸಡ್ವೊಣೆಚೆ ರಗತ್
ಜಿರೊವ್ನ್
ಜಯ್ತಾಚಿ ಸಾಕ್ಸ್ ದಿಲ್ಲಿ
ತುಜಿ ಪಾವನ್ ಮಾತಿ
ಮ್ಹಜ್ಯಾ ಭಾವಾರ್ಥಾಕ್ ಜಿವಿ ಸಾಕ್ಸ್ ..
ದೆವಾಚ್ಯೊ ಭಾಸವ್ಣ್ಯೊ
ತುಂವೆಂ ಆಯ್ಕಾಲ್ಯೊಯ್
ತಾಚೊ ಶಿರಾಪ್ ಭೊಗ್ಲೊ
ಕ್ರಿಸ್ತ್ ಜಲ್ಮೊನ್, ಜಿಯೆವ್ನ್ , ಮೊರೊನ್
ಪುನರ್ ಜೀವ್ ಜೊಡ್ತಾ ಪರ್ಯಾಂತ್
ದೇವಾಚ್ಯಾ ಮಹಿಮೆಕ್
ತುಂ ಪರತ್ ಪರತ್
ಅಮರ್ ಸಾಕ್ಸ್ ಜೆರುಜಲೆಮಾ ...
– ಅನಿಲ್ ಬೈಂದೂರ್