ಆಜೂನ್‍ಯೀ ಕಾಂಯಿಂಚ್
ಬದ್ಲೊಂಕ್ ನಾಂ
ತುಜ್ಯಾ ಜೆರುಜಲ್ಯಾಂತ್
ಸಗ್ಳೊ ಸಂಸಾರ್ ತುಕಾ
ರಾಯ್ ಮಾನ್ತಾನಾ
ತುಜ್ಯಾ ಕುಳಿಯೆಕ್ ಮಾತ್ರ್
ತುಂ ಎಕ್ ನಜರೆತ್ಚೊ ಯೆಶುವಾ...
ಗೆತ್ಸೆಮನಿಂತ್ಲೆ
ಜಯ್ತುನಾಚೆ ರೂಕ್
ಅಜೂನಿ ಉಬೆ
ಸಾಕ್ಸ್ ದಿತಾತ್
ತರಯೀ ತಾಂಚೆ ಕಾಳಿಜ್
ಕಠೋರ್ ಪಾಜೆ ಫಾತೊರ್...
ಬಾಪಾನ್ ಪುತಾಚ್ಯಾ
ಕಣ್ವಳಾಯೆಕ್
ಪಿಯೆಂವ್ಕ್ ವೆಚಿ
ಕಾಲ್ಸ್ ನಿವಾರಲ್ಲಿ ತರ್..?
ಮನ್ಶ್ಯಾಕುಳಾಚೆ ಪಾಪ್
ಸೊಡ್ವೊಣ್ ನಾಸ್ತಾ
ಭಿರಾಂಕುಳಾಯೆಂತ್ ನಾಸ್ ಜಾತೆ...
ತಾಕಾ ಧರ್ಚ್ಯಾಕ್ ತಾಣಿಂ
ದಾಂಡೆ, ತೊಣ್ಕೆಂ
ತಲ್ವಾರಿ ಹಾಡಲ್ಲಿಂ
ಪುಣ್ ತಾಣೆಂ ತಾಕಾ
ಕೇವಲ್ ಎಕಾ
ಉಮ್ಯಾಂತ್ ಧರುನ್ ದಿಲೊ .
ತಾಚೆ ಖುರ್ಸಾಚೆ ಮರಣ್
ಅಧುರೆ ಉರೊಂವ್ಕ್ ನಜೊ
ಮ್ಹಳ್ಳ್ಯಾ ಇರಾದ್ಯಾನ್
ತ್ಯಾ ರುಕಾಡಾಚ್ಯಾ
ಅಸ್ಕತ್ ಖುರ್ಸಾಚ್ಯಾ
ಹರ್ದ್ಯಾರ್ ಪಯ್ಲೆಂಚ್
ದಾಟೆ ಮೊಟೆ
ಖಿಳೆ ಖಿಳಾಯಿಲ್ಲೆ.
ನೆಗಾರಲ್ಲ್ಯಾ, ನಾಕರಲ್ಲ್ಯಾ
ದುಬಾವಲ್ಲ್ಯಾ ಸಾಂಗಾತಾ
ಎಕೆಕ್ಲೆಂ ಎಕೇಕಾ ದಿಕ್ಕಾಕ್ ಲಿಪ್‍ಲ್ಲೆಂ
ಅಕ್ರೇಚ್ಯಾ ಘಡಿಯೆಕ್
ತ್ಯಾ ನಿತ್ರಾಣ್ ಜೀವಾಕ್
ಆಧಾರ್
ರುಕಾಡಾಚೊ ಖುರಿಸ್
ಆನಿಂ ತೀನ್ ಖಿಳೆಂ ಮಾತ್ರ್.
ಸಗ್ಳೆ ಬರಯ್ಲಾ ತಶೆಂ
ಘಡೊನ್ ಪೂರ್ಣ್ ಜಾಲ್ಲೆಂ.
ಪುಣ್ ಎಕ್ ಮಾತ್ರ್ ಬರಾಪ್
ಅಪೂರ್ಣ್ ಉರ‍ಲ್ಲೆಂ
ಜೆಜು ನಜರೆನ್
ಜುದೆವಾಂಚೊ ರಾಯ್ .
ಕೊಣಾಕ್ ಸೊದ್ತಾತ್ ತುಮಿಂ
ಮ್ಹಣ್ತಾನಾ ತಾಣಿಂ
ಧಯ್ರಾನ್ ಜಾಪ್ ದಿಲಿ
ನಜರೆತಾಚ್ಯಾ ಜೆಜುಕ್..
ಆಜ್ ತುಕಾ ಸೊದ್ಚ್ಯಾಕ್‍ಚ್
ಆಮಿಂ
ಥೊಡೆಂ ರಾವ್ಳೆರಾ ಸಾರ್ಕ್ಯೊ ಸುವಾತ್ಯೊ
ಉಬಾರ್ಲ್ಯಾತ್.