By ByndoorchiZalak, Pics: Lawrence Fernandes & Rajesh Quadras, 26 July, 2026
ಬೈಂದೂರ್: ಫಿರ್ಗಜೆಚಾ ಕುಟ್ಮಾಂ ಆಯೋಗಾಚಾ ಮುಕೇಲ್ಪಣಾರ್ ಜುಲಾಯ್ 26 ತಾರೀಕೆರ್, ಆಯ್ತಾರಾ ಸಕಾಳಿಂ ಮಾಲ್ಗಡ್ಯಾಂಚೊ ದೀಸ್ ಆಚರಣ್ ಕೆಲೆಂ. ಉಡುಪಿ ದಿಯೆಸೆಜ್ ಸಾಮಾಜಿಕ್ ಅಭಿವೃದ್ಧಿ ಆಯೋಗ್ ಆನಿ ಸಂಪದ ಸಂಸ್ಥ್ಯಾಚೊ ದಿರೆಕ್ತೊರ್ ಬಾಪ್ ರೆಜಿನಾಲ್ಡ್ ಪಿಂಟೊ ಆನಿ ವಿಗಾರ್ ಬಾಪ್ ಡೆನಿಸ್ ಡಿ’ಸೋಜಾ ಸಾಂಗಾತಾ ಫಿರ್ಗಜೆಚಾ ಮಾಲ್ಗಾಡ್ಯಾಂನಿ ಆನಿ ಫಿರ್ಗಜ್ ಲೊಕಾನ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ.
ಉಪ್ರಾಂತ್ ಮಾಲ್ಗಡ್ಯಾಂಕ್ ಗೌರವ್ ಪಾಟಂವ್ಚ್ಯಾ ಖಾತಿರ್ ಫಿರ್ಗಜೆಚಾ ಮಿನಿ ಹೊಲಾಂತ್ ಮಾಂಡುನ್ ಹಾಡ್ಲ್ಲ್ಯಾ ಕಾರ್ಯಕ್ರಮಾಂತ್ ಸಂಪನ್ಮೂಲ್ ವ್ಯಕ್ತಿ ಜಾವ್ನ್ ಬಾಪ್ ರೆಜಿನಾಲ್ಡ್ ಪಿಂಟೊ, ವಿಗಾರ್ ಬಾಪ್ ಡೆನಿಸ್ ಡಿ’ಸೋಜಾ, ಕೊವೆಂತಾಚಿ ವ್ಹಡಿಲ್ನ್ ಸಿಸ್ಟರ್ ತೆರೆಸಾ ಬುತೆಲ್ಲೊ, ಫಿರ್ಗಜ್ ಗೊವ್ಳಿಕ್ ಮಂಡಳಿ ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸ್ ಆನಿ ಕುಟ್ಮಾಂ ಆಯೋಗಾಚೊ ಸಂಚಾಲಕ್ ರೊಬರ್ಟ್ ರೆಬೆಲ್ಲೊ ವೇದಿ ಕಾರ್ಯಕ್ರಮಾಂತ್ ಹಾಜರ್ ಆಸ್ಲ್ಲಿಂ.
ಕುಟ್ಮಾಂ ಆಯೋಗಾಚೊ ಸಂಚಾಲಕ್ ರೊಬರ್ಟ್ ರೆಬೆಲ್ಲೊನ್ ಕಾರ್ಯಕ್ರಮಾಂತ್ ಹಾಜರ್ ಜಾಲ್ಲ್ಯಾ ಮಾಲ್ಗಡ್ಯಾಂಕ್ ಸ್ವಾಗತ್ ಕರುನ್ ವೇದಿ ಕಾರ್ಯಕ್ರಮಾಂತ್ ಹಾಜರ್ ಜಾಲ್ಲ್ಯಾ ಸರ್ವಾಂಕ್ ಗುಲೊಬ್ ದೀವ್ನ್ ಸ್ವಾಗತ್ ಕೆಲೆಂ.
ವಿಗಾರಾನ್ ಸರ್ವ್ ಮಾಲ್ಗಡ್ಯಾಂಕ್ ಉಲ್ಲಾಸ್ ಪಾಟಯ್ಲೆಂ ಆನಿ ಬಾಪ್ ರೆಜಿನಾಲ್ಡ್ ಪಿಂಟೊನ್ ಮಾಲ್ಗಡ್ಯಾಂಕ್ ತಾಂಚಾ ಭಲಾಯ್ಕಿ ಆನಿ ಖಾಣಾ-ಜೆವ್ಣಾಚಿ ಚತ್ರಾಯ್ ಸಾಂಬಾಳ್ಚ್ಯಾ ವಿಷಯಾಚೆರ್ ಮಾಹೆತ್ ದಿಲಿಂ. ವಿಗಾರಾನ್ ಆನಿ ಫಿರ್ಗಜ್ ಗೊವ್ಳಿಕ್ ಮಂಡಳಿ ಕಾರ್ಯದರ್ಶಿ ವೀಣಾ ಫೆರ್ನಾಂಡಿಸಾನ್ ಮಾಲ್ಗಡ್ಯಾಂಕ್ ವಿವಿಧ್ ಖೆಳ್ ಚಲವ್ನ್ ವ್ಹೆಲೆಂ. ಕಾರ್ಯಕ್ರಮಾಕ್ ಆಧಾರ್ ದಿಲ್ಲ್ಯಾಂಕ್ ಆನಿ ಹಾಜರ್ ಜಾಲ್ಲ್ಯಾ ಸರ್ವಾಂಕ್ ಜುಡಿತ್ ಲೋಬೊನ್ ಧನ್ಯವಾದ್ ಪಾಟಯ್ಲೆಂ ಆನಿ ಜೊಸ್ಪಿನ್ ರೊಡ್ರಿಗಸಾನ್ ಕಾರ್ಯಕ್ರಮ್ ಚಲವ್ನ್ ವ್ಹೆಲೆಂ.
